ബര്‍ലിന്‍: ജര്‍മ്മനിയിലെ ദശലക്ഷക്കണക്കിന് തൊഴിലാളികള്‍ക്ക് ആശ്വാസമേകി രാജ്യത്തെ നിയമാനുസൃത മിനിമം വേതനവും (Mindestlohn) മിനിജോബ് (ങശിശഷീയ) വരുമാന പരിധിയും വര്‍ദ്ധിപ്പിക്കുന്നു. 2027 ജനുവരി 1 മുതല്‍ മിനിമം വേതനം മണിക്കൂറിന് 14.60 യൂറോയായി ഉയരും. ഇതിന് ആനുപാതികമായി മിനിജോബ് ചെയ്യുന്നവരുടെ പ്രതിമാസ നികുതി രഹിത വരുമാന പരിധി 633 യൂറോയായി ഉയര്‍ത്തുമെന്നും ഫെഡറല്‍ തൊഴില്‍~സാമൂഹിക മന്ത്രാലയം വ്യക്തമാക്കി.
മിനിജോബുകാര്‍ക്ക് പ്രതിവര്‍ഷം 360 യൂറോ അധികം:
നിലവില്‍ (2026ല്‍) പ്രതിമാസം പരമാവധി 603 യൂറോ വരെയാണ് മിനിജോബില്‍ നികുതിയില്ലാതെ സമ്പാദിക്കാന്‍ അനുവാദമുള്ളത്. ഇത് 633 യൂറോയായി വര്‍ദ്ധിക്കുന്നതോടെ മിനിജോബ് തൊഴിലാളികള്‍ക്ക് പ്രതിമാസം 30 യൂറോയുടെ അധിക വരുമാനം ലഭിക്കും. ഒരു വര്‍ഷത്തില്‍ മൊത്തം 360 യൂറോയുടെ അധിക നേട്ടമാണ് ഇതുവഴി ഓരോരുത്തര്‍ക്കും ലഭ്യമാകുക. 2022 മുതല്‍ മിനിജോബിന്റെ ഉയര്‍ന്ന വരുമാന പരിധി മിനിമം വേതനവുമായി നേരിട്ട് ബന്ധിപ്പിച്ചിട്ടുള്ളതിനാലാണ് (dynamisch) മണിക്കൂര്‍ വേതനം കൂടുമ്പോള്‍ മിനിജോബ് പരിധിയും സ്വമേധയാ ഉയരുന്നത്.
രണ്ട് ഘട്ടങ്ങളായുള്ള വര്‍ദ്ധനവ്:
മിനിമം വേതന കമ്മീഷന്റെ ശുപാര്‍ശയെ തുടര്‍ന്ന് 2025 ഒക്ടോബറിലാണ് ഫെഡറല്‍ മന്ത്രിസഭ രണ്ട് ഘട്ടങ്ങളായുള്ള വേതന വര്‍ദ്ധനവിന് അംഗീകാരം നല്‍കിയത്. ഇതിന്റെ ആദ്യ ഘട്ടമായി 2026 ജനുവരി 1 മുതല്‍ മിനിമം വേതനം മണിക്കൂറിന് 13.90 യൂറോയാക്കി നിശ്ചയിച്ചിരുന്നു. ഇതിന്റെ രണ്ടാം ഘട്ടമായാണ് 2027 ജനുവരി 1 മുതല്‍ വേതനം 14.60 യൂറോയായി ഉയര്‍ത്തുന്നത്.
60 ലക്ഷത്തോളം തൊഴിലാളികള്‍ക്ക് പ്രയോജനം:
ജര്‍മ്മന്‍ ട്രേഡ് യൂണിയന്‍ ഫെഡറേഷന്റെ (DGB) കണക്കുകള്‍ പ്രകാരം ജര്‍മ്മനിയിലെ ഏകദേശം 60 ലക്ഷത്തോളം (6 ദശലക്ഷം) തൊഴിലാളികള്‍ക്ക് ഈ പുതിയ വേതന വര്‍ദ്ധനവിന്റെ പ്രയോജനം ലഭിക്കും. വേതന വര്‍ദ്ധനവ് നടപ്പിലാകുന്നതിലൂടെ രാജ്യത്തെ തൊഴിലുടമകള്‍ക്ക് അധിക വേതനച്ചെലവായി 2026~ല്‍ 2.2 ബില്യണ്‍ യൂറോയും, 2027~ല്‍ 3.4 ബില്യണ്‍ യൂറോയും വേണ്ടി വരുമെന്നാണ് ഫെഡറല്‍ സര്‍ക്കാരിന്റെ കണക്കുകൂട്ടല്‍.
Comments: